ტურიზმის განვითარების სტრატეგია და სამოქმედო გეგმა (5 წლის პერსპექტივა) წარმოადგენს დეტალურად გააზრებულ „გზამკვლევს“ თუ რა ფასეულობებზე დაყრდნობით და რა ქმედებებით არის შესაძლებელი, სვანეთის, როგორც გამორჩეული ტურისტული მიმზიდველობის მქონე ადგილის, ჩამოყალიბება.

​

სტრატეგიული ხედვა ეფუძნება ურთიერთგაზიარებულ ღირებულებებსა და საერთაშორისო ტენდენციებს. ხედვის განხორციელებისთვის წარმოდგენილია 5 სტრატეგიული მიზანი, ხოლო ცალკეული მიზნის მისაღწევად შემოთავაზებულია 10-მდე კონკრეტული პრიორიტეტული ქმედება. ცალკეული ქმედების განხორციელებისათვის მითითებულია ინიციატორი ორგანიზაცია და მხარდამჭერები, დროითი ჩარჩო და ფინანსური შეფასება. წარმოდგენილია საერთაშორისო პრაქტიკაზე დაყრდნობით მონიტორინგისთვის საჭირო ინდიკატორები.

​

პირველი სტრატეგიული მიზანი ემსახურება მთავარ ფუნდამენტურ წინაპირობას, რომ სვანეთში შეიქმნას კეთილმოწყობილი საცხოვრებელი და რეკრეაციული გარემო. ამ მიზნის მისაღწევად საჭიროა კონსოლიდირებული და კოორდინირებული ძალისხმევა, რაც სცილდება მუნიციპალური მმართველობის შესაძლებლობებს. ქმედებები ეხება - ინფრასტრუქტურას, საჯარო სერვისებს, ურბანულ გეგმარებას, საგზაო ინფრასტრუქტურას, ტრანსპორტს, ენერგომომარაგებას, წყალმომარაგებასა და კანალიზაციას და მყარი ნარჩენების მართვას.

​

სვანეთის მთავარი ტურისტული ღირსშესანიშნაობა სათავგადასავლო ტურიზმის განუსაზღვრელი შესაძლებლობებია, რაც ეფუძნება ბუნებრივ და ისტორიულ-კულტურულ მემკვიდრეობას და სვანი მასპინძლებისა და მეგზურების ისტორიულად ჩამოყალიბებულ მსოფლმხედველობას.  სტრატეგიული გეგმა ითვალისწინებს მსოფლიო დონის სამთო-სათავგადასავლო შეთავაზებებს, რომლებიც უკავშირდება ფრირაიდს, მთამსვლელობას, ჰელისკის, სკი-ტურინგს და სხვა ექსკლუზიურ სამთო-სათავგადასავლო ტურისტულ პროდუქტს. საერთაშორისო ფესტივალები და სპორტული შეჯიბრები მსგავსი საქმიანობის პოპულარიზაციის საუკეთესო შესაძლებლობაა. სვანეთი ასეთ საერთაშორისო ღონისძიებებს მასპინძლობს ტრადიციულ კულტურულ-ისტორიულ გარემოში, რაც დაუვიწყარ შთაბეჭდილებას ახდენს მონაწილეებსა და სტუმრებზე.

კვალიფიციური სერვისის შეთავაზება (იქნება ეს სამთო გამყოლობა თუ სასტუმროს მომსახურება) შეუძლებელია მიღწეული იქნას პროფესიული სწავლების, სერტიფიცირებისა და საერთაშორისო აღიარების გარეშე. შესაბამისად პროფესიული განათლება სტუმართმასპინძლობის სექტორსა და სამთო-სათავგადასავლო პროფესიებში არის ერთადერთი სწორი გზა კეთილდღეობისა და კონკურენტუნარიანი გარემოს უზრუნველსაყოფად.

 

შესაბამისად მე-3 სტრატეგიული ამოცანა ეძღვნება პროფესიული სწავლების პოპულარიზაციას, სწავლების ფორმალიზებასა და სერტიფიცირებას და შესაბამის საერთაშორისო აღიარებას. ამის ერთ-ერთი კონკრეტული საქმიანობის მიმართულებაა სათავგადასავლო ტურიზმის პროფესიების სწავლება/აკრედიტაცია და ამისთვის სათავგადასავლო ტურიზმის რეგიონალური ფილიალის დაარსება მესტიაში/დასავლეთ საქართველოს მასშტაბით.

სვანეთის საერთაშორისო ცნობადობისათვის აუცილებელია მიზანმიმართული და შედეგზე ორიენტირებული მარკეტინგული და სარეკლამო საქმიანობა, რომელიც გაითვალისწინებს საერთაშორისო ტენდენციებს, მარკეტინგულ საშუალებებს და სარეკლამო სოც-მედია არხებს. მიზნობრივ ბაზრებზე (მომხმარებელი) წვდომა შესაძლებელია სპეციფიკური ინსტრუმენტების გამოყენებით, როგორიცაა სოც-მედიის საშუალებით მოგზაურთა მოგონებები, ისტორიები, შთაბეჭდილებების გაზიარება. ამასთან ერთად ტრადიციული ტურისტული კომპანიებისა და ასოციაციების დაინტერესების ხელშეწყობა სხვადასხვა სარეკლამო კამპანიებისა და ღონისძიებების მოწყობის გზით.

​

მეხუთე სტრატეგიული მიზანი ითვალისწინებს ტურისტული ადგილის მართვა-მენეჯმენტში საუკეთესო საერთაშორისო პრაქტიკის დანერგვის და ამ მიზნით კონკრეტული ქმედებების განხორციელებას. ერთიანობაში, შემოთავაზებული 5 სტრატეგიული მიზანი ასე გამოიყურება: 1. ინფრასტრუქტურა და საჯარო სერვისები; 2. უნიკალური ტურისტული შეთავაზება; 3. კომპეტენტური კადრების მომზადება; 4. მიზნობრივი მარკეტინგი და რეკლამირება; 5. ინტეგრირებული მართვის საუკეთესო პრაქტიკის დანერგვა. ამ მიზნების მიღმა კვლავაც რჩება ბევრი მნიშვნელოვანი საკითხი, რომელიც პირდაპირ თუ ირიბად განაპირობებს ტურიზმის სტრატეგიის რეალისტურობას.  მიუხედავად ამისა, მნიშვნელოვანია რომ ტურიზმის განვითარების რეგიონალური სტრატეგია იყოს განხორციელებადი და მისი სამოქმედო გეგმა ეყრდნობოდეს რეალურ შესაძლებლობებს, იყოს განხორციელებადი 5 წლის პერსპექტივით, შესაძლებელი იყოს მისი შედეგების მონიტორინგი და საჭიროების შემთხვევაში ცვლილებების შეტანით მისი ადაპტირება.